चुनिला हत्याप्रकरण : देवर, देवरानीसहित चार जना पक्राउ

धरानःधरान–६ स्थित पाँचकन्या सामुदायिक जङ्गलमा मृत फेला परेकी चुनकुमारी बुढाथोकीको हत्या भएको खुलेको छ।

प्रहरी अनुसन्धानले यो घटनामा परिवारका सदस्यहरू नै संलग्न रहेको तथ्य बाहिर ल्याएको छ।

गत सोमबार दिउँसो १२:३० बजे अर्धनग्न अवस्थामा मृत फेला परेकी ४० वर्षीया बुढाथोकीको हत्या आरोपमा उनका देवर, देवरानी, नन्द र एक सहयोगी गरी चार जनालाई प्रहरीले पक्राउ गरेको हो। उनीहरूलाई झापा र मोरङबाट बिहीबार राति भाग्ने क्रममा पक्राउ गरिएको जिल्ला प्रहरी कार्यालय सुनसरीले जनाएको छ।

प्रहरीका अनुसार चुनकुमारीलाई झुक्याएर पाँचकन्या जङ्गलमा लगिएको र त्यहीँ घाँटी र शरीरका अन्य भागमा चोट लाग्ने गरी हत्या गरिएको प्रारम्भिक अनुसन्धानबाट खुलेको हो।

महालक्ष्मी नगरपालिका–१ माइती भएकी बुढाथोकी विगत दुई वर्षदेखि इटहरीको हलगडामा डेरामा बस्दै छोराको पढाइको जिम्मा सम्हाल्दै आएकी थिइन्। उनका श्रीमान प्रेमबहादुर बुढाथोकी वैदेशिक रोजगारीको सिलसिलामा कोरियामा छन्।

घटनामा अन्य व्यक्तिको पनि संलग्नता हुनसक्ने आशंकामा थप अनुसन्धान जारी रहेको प्रहरीले जनाएको छ।