इटहरी : आदिवासी जनजाति महासङ्घले कोशी प्रदेशको नाम खारेजीको माग गर्दै इटहरीमा संयुक्त सभाको आयोजना गरेको छ । प्रहरीको कडा सुरक्षाका बिच इटहरी पश्चिम लाइनमा ९ जनजाति सङ्घको आयोजनामा सभा सम्पन्न भएको हो ।
आदिवासी जनजाति महासङ्घका अध्यक्ष ग्याल्जेन शेर्पाको प्रमुख आतिथ्यमा प्रदेश भरिका जनजातिहरू भेला भएका छन् । ऐतिहासिक सभ्यता सहित पहिचानको आधारमा सबै प्रदेशको नामकरण गर्नुपर्ने उनीहरूको माग छ । संविधानमा उल्लेख भए अनुसार स्वायत्त क्षेत्र, विशेष क्षेत्र र संरक्षित क्षेत्र कायम गर्नुपर्ने बताइएको छ ।
थारु आन्दोलनमा आदिवासी जनजाति माथि लगाइएको झुटा मुद्दा खारेजीको माग गर्दै महासङ्घहरूले सङ्घीयता र धर्मनिरपेक्षता माथिको प्रहार बन्द गर्न आह्वान गरेका छन् ।
विगतको सरकारले प्रदेशका मूलवासीमाथि सामाजिक तथा सांस्कृतिक विभेद गरेको भन्दै त्यसलाई सच्याउन माग गरिएको छ । ९ जातीय सङ्घ संस्थाहरूले ऐक्यबद्धता जनाएको कार्यक्रममा सम्पूर्ण आदिवासी जनजातिहरू एक भएको सन्देश प्रवाह गर्ने प्रयास भएको छ ।
कोशी प्रदेश नामाङ्कन भएपछि आदिवासी जनजातिहरू पहिचानको आधारमा नामाङ्कन हुनुपर्ने भन्दै आन्दोलनमा उत्रिइरहेका छन् । लामो समयदेखि स्थगित भएको आन्दोलनका कार्यक्रम पुनः सुरु भएका छन्।
