आज काठमाडौंबाट भोजपुर जाँदै गरेको यात्रुबाहक बस सिन्धुलीमा दुर्घटना हुँदा दुई जनाको मृत्यु भएको छ भने १५ जना बढी घाइते भएका छन्।
मदन भण्डारी लोकमार्ग अन्तर्गत सिन्धुलीको हरिहरपुरगढी गाउँपालिका–५, महेन्द्रझ्याडी भल्खडामा बागमती प्रदेश ०१–००६ ख ६७८५ नम्बरको यात्रुबाहक बस दुर्घटना भएको हो।
दुर्घटनास्थलमै दुई जनाको मृत्यु भएको उक्त गाउँपालिकाका अध्यक्ष वज्रध्वज वाइबाले जानकारी दिए। दुर्घटना स्थलमा प्रहरी, गाउँपालिकाका जनप्रतिनिधि र स्थानीय उद्धारमा खटिएका छन्।
दुर्घटनाका गम्भीर घाइतेहरूको उद्धार गरेर मरिण गाउँपालिका–६ कपिलाकोट र सिन्धुली अस्पताल तर्फ लगिदै गरिएको छ। केही घाइतेको हरिहरपुरगढी–४ को महेन्द्रझ्याडी स्वास्थ्य चौकीमा उपचार भइरहेको अध्यक्ष वाइबाको भनाई रहेको छ। दुर्घटनाबारे विस्तृत विवरण आउन बाँकी रहेको छ।
