२९श्रावण धरान :प्रहरीले हवाई फायर गरी एक क्विन्टल लागूऔषध गाँजा नियन्त्रणमा लिएको छ ।
  मंगलबार धरान उपमहानगरपालिका १५ श्यामचोकबाट पानबारी जाने सेउती पुलमा गस्तीमा रहेको प्रहरीलाई छलेर भाग्न खोज्दा हवाई फायर गरी गाँजा लोड गरिएको कार नियन्त्रणमा लिइएको जिल्ला प्रहरी कार्यलय सुनसरीका प्रहरी नायब उपरीक्षक नवीनकृष्ण भण्डारीले जानकारी दिए ।
धरानबाट खटिएको प्रहरी अधिकृतको टोलिले भारतीय नम्बर प्लेटको डब्लूबी ७४एस२५३१ नम्बरको कारमा लोड गरिएको गाँजा नियन्त्रणमा लिन चाइनिज पेस्तोलबाट १ राउण्ड हवाई फायर गरेको जिल्ला प्रहरी कार्यलय सुनसरीले जनाएको छ ।
  प्रहरी नायब उपरीक्षक भण्डारीका अनुसार कारलाई रोक्नको लागि पटक पटक मौखिक अनुरोध गर्दा समेत नमानेको र कार तीव्र गतिमा अघि बढेकोले हवाई फायर नै गर्नु परेको उनले बताए ।
उक्त कारलाई पछ्याउँदै जाँदा करिब ३५ मिटरपर कार छाडी चालक जंगलतर्फ भागेको थियो । उक्त कार जाँच गर्दा प्लास्टिकको ५ वटा बोरामा एक सय केजी अवैध लागूऔषध गाँजा बरामद गरिएको भण्डारीले जानकारी दिए ।
कार चालक फरार रहेकाले खोजी कार्य भैरहेको र घटनाको थप अनुसन्धान सुरु गरेको प्रहरी नायब उपरीक्षक भण्डारीले बताए ।