१८श्रावण धरान :इटहरी चोकमा शुक्रबार दिउँसो सवारी दुर्घटनामा एक जनाको मृत्यु भएको छ । इटहरीको मुख्यबाट दक्षिण मोडमा दिउँसो ट्रकले ठक्कर दिँदा एक पुरुष साइकलयात्रीको घटनास्थलमै मृत्यु भएको जिल्ला प्रहरी कार्यालय सुनसरीका प्रहरी नायब उपरीक्षक नवीनकृष्ण भण्डारीले जानकारी दिए ।
मृत्यु हुनेमा भोजपुर षडानन्द नगरपालिका–१४ का ४२ वर्षीय रामचन्द्र श्रेष्ठ रहेको जिल्ला प्रहरी कार्यालय सुनसरीले जनाएको छ । साइकलयात्री श्रेष्ठलाई प्रदेश १–०२–००१ख९२९४ नम्बरको ट्रकले ठक्कर दिएको प्रहरीले जनाएको छ ।
पूर्वबाट जाँदै गरेका साइकलयात्रीलाई सोही दिशाबाट गइरहेको ट्रकले पछाडिबाट ठक्कर दिएको थियो । प्रहरीले सीसीटीभी फुटेज मगाएर घटनाको वास्तविकता पत्ता लगाउन सुरु गरेको प्रहरी नायब उपरीक्षक भण्डारीले जानकारी दिए ।