धरानः धरानमा कारमा बन्दुक र हातहतियार भेटेपछि प्रहरीले पाँचजना पक्राउ गरेको छ ।
इलाका प्रहरी कार्यालय धरानबाट खटिएको प्रहरी टोलीले धरानबाट रासतालतर्फ जाँदै गरेको बा४ च ४३३ नम्बरको कारमा चेकजाँच गर्दा भरुवा बन्दुकसहितका हातहतियार फेला परेको जिल्ला प्रहरी कार्यालय सुनसरीका प्रमुख एसपी सुमनकुमार तिम्सिनाले जानकारी दिए । प्रहरीले १ थान भरूवा बन्दुक, भरूवा बन्दुकमा लाग्ने फलामको गोली ३ थान, टोटा बन्दुकको गोली २ थान, बारूद र एकथान खुकुरीसहित पाँचजनालाई पक्राउ गरिएको प्रहरीले जनाएको छ ।
धरान–१९ स्थित हरियाली सामुदायिक वन परिसरबाट उनीहरू पक्राउ परेका हुन् ।
इटहरी–१३ बस्ने ३५ वर्षीय ज्योतिष चौधरीसहित पाँचजनालाई पक्राउ गरिएको प्रहरीले जनाएको छ । कारमा सवार उनीहरूलाई पक्राउ गरी थप अनुसन्धान थालिएको प्रहरीले जनाएको छ । अनुसन्धानकै चरणमा रहेकोले अन्य थप विवरण भने प्रहरीले सार्वजनिक गरेको छैन ।
