संजिता धमला
धरान: रक्तदान अभियानमा सक्रिय सामाजिक संस्था ब्लड फर निड ले सुनसरी क्षेत्रीय समितिको अध्यक्षमा अरमान अलीलाई चयन गरेको छ। शनिबार धरान-१८ स्थित एमसी क्याफेमा सम्पन्न संस्थाको तेस्रो बैठकले नयाँ ९ सदस्यीय कार्यसमिति गठन गरेको हो। यसअघि समितिको अध्यक्ष प्रकाश गिरी थिए।
कार्यक्रमको प्रमुख अतिथि संस्थाका केन्द्रिय अध्यक्ष सरोज दाहाल तथा विशेष अतिथि केन्द्रिय कोषाध्यक्ष प्रकाश गिरीको उपस्थितिमा नयाँ कार्यसमितिको गठन गरिएको थियो। कार्यसमितिको उपाध्यक्षमा सुभिक्षा राई, सचिवमा प्रतीक ओझा, र कोषाध्यक्षमा पूजा अग्रवाल चयन भएका छन्। अन्य सदस्यहरूमा ठाकुर बहादुर कार्की, भरतराज शर्मा (गोपाल), प्रथम अग्रवाल, रक्षा घिमिरे, र अनोज शर्मा रहेका छन्।
कार्यक्रममा ब्लड फर निडको धनुषा क्षेत्रीय समितिको सहकार्यमा मधेश प्रदेशको राजधानी जनकपुरधाममा आयोजित “बधाई तथा सम्मान कार्यक्रम” को समेत चर्चा गरियो। उक्त कार्यक्रममा हालका केन्द्रिय अध्यक्ष सरोज दाहाल र कोषाध्यक्ष प्रकाश गिरीलाई सम्मान गरिएको थियो।
नवनियुक्त सुनसरी अध्यक्ष अरमान अली कोरोना महामारीको समयमा सामाजिक कार्यमा सक्रिय रहँदै आएका छन्। सार्वजनिक कुकुरहरूको उद्धारदेखि विभिन्न सामाजिक गतिविधिहरूमा उनले उल्लेखनीय योगदान पुर्याएका छन्। साथै, अरमान राष्ट्रिय स्वतन्त्र पार्टीसँग आबद्ध छन् र सामाजिक क्षेत्रमा आफ्नो सक्रिय भूमिका निर्वाह गरिरहेका छन्।
ब्लड फर निड संस्थाले सुनसरी क्षेत्रमा रगत आवश्यक परेका बिरामीहरूलाई मद्दत गर्दै समाजसेवाको कार्यलाई निरन्तरता दिने उद्देश्य लिएको छ।
