धरानः समाजवादी विद्यार्थी युनियनले सागर सर्गम चेम्जोङलाई प्रदेश १ को अध्यक्षमा चयन गरेको छ।
जसपा नेपाल निकट समाजवादी विद्यार्थी युनियनको नेतृत्वमा आएका चेम्जोङ
एक बौद्धिक र स्पष्ट वक्ता नेताको रूपमा परिचित छन भने २०७३ को निर्बाचित महेन्द्र बहुमुखि क्याम्पस धरानका स्वबियु सभापति समेत हुन्।विद्यार्थी आन्दोलनमा दृढ विश्वास राख्ने चेम्जोङले अध्यक्षको भूमिकामा छात्र-छात्राहरूको हकहितका लागि निरन्तर संघर्ष जारी राख्ने प्रतिबद्धता व्यक्त गरेका छन्।
चेम्जोङको नेतृत्वमा २६ सदस्यीय प्रदेश स्तरीय समिति पुनर्गठन गरिएको छ। अध्यक्षमा चयन भएपछी उनीप्रति विद्यार्थी, सहकर्मी तथा शुभचिन्तकहरूले शुभकामना व्यक्त गरेका छन्। चेम्जोङले प्रदेश १ मा सवारी दुर्घटनाबाट पीडित विद्यार्थीहरूको संरक्षण र उनीहरूको हकअधिकार सुनिश्चित गर्नका लागि संघर्ष गर्ने बताएका छन्।
कार्यक्रममा जसपा नेपालका सह–अध्यक्ष रकम चेम्जोङले अशोक राई समूहले पार्टी विभाजन गरे पनि यसको कुनै औचित्य पुष्टि गर्न नसकेको दाबी गरे। उनले भने, “अशोक राई समूहले पार्टी विभाजन गर्यो तर उनीहरू राजनीतिक मञ्चबाट नै ओझेल परेका छन्। यसले दलित, मधेसी, आदिवासी जनजाति, महिला लगायत उत्पीडित समुदायको हकहितमा कुनै योगदान गर्न सकेन।”
कार्यक्रममा जसपा नेपालका केन्द्रीय सदस्यहरू, प्रदेशस्तरीय नेताहरू, समाजवादी युवा संघ नेपालका प्रदेश उपाध्यक्ष दिनेश राई, समाजवादी महिला संघ नेपालकी अध्यक्ष ओममाया आङ्देम्बे लगायतका नेताहरूको उपस्थिति रहेको थियो।
