धरानः धरान-२० स्थित चिण्डे डाँडामा निर्माण हुने सुम्निमा पारुहाङको प्रतिमा बनाउनका लागि आयोजना गरिएको च्यारिटी कन्सर्ट ‘सुम्निमा पारुहाङ साँझ २०८१’ सफल बनाउन चर्चित कलाकारहरू धरान आइपुगेका छन्।
यस कन्सर्टमा नेपाली सांगीतिक क्षेत्रमा ख्याति कमाएका कलाकारहरू सविन राई, जोन राई, पूर्ण राई, विष्णु चेम्जोङ, द्रब्य, र आरोही ब्याण्डको प्रस्तुति रहनेछ। साथै, विशेष आकर्षणको रूपमा धरान उपमहानगरपालिकाका मेयर हर्कराज राई साम्पाङले पनि आफ्नो प्रस्तुति दिनेछन्। कार्यक्रमको आयोजना सिल्भर इन्टरटेण्टमेन्टले गरेको हो, जसका सञ्चालक सौरव श्रेष्ठले कार्यक्रमलाई सफल बनाउन कलाकारहरू धरान आइसकेको जानकारी दिए।
कार्यक्रमको संयोजक मिना सिंगकका अनुसार, कन्सर्ट करिब तीन बजेदेखि सुरु हुनेछ। “साँझको मुख्य कार्यक्रम अघि, च्यारिटीमा योगदान दिने दाताहरूको सम्मान कार्यक्रम हुनेछ, जसपछि ठीक ५ बजेदेखि सांगीतिक प्रस्तुति सुरु हुनेछ,” उनले भनिन्।
यसअघि अविरल वर्षाका कारण स्थगित गरिएको कन्सर्टको मिति मंसिर ७ गतेका लागि तय गरिएको थियो।
सुम्निमा पारुहाङको प्रतिमा र पार्क निर्माणमा साम्पाङको नेतृत्व
सुम्निमा पारुहाङको प्रतिमा निर्माणका लागि मेयर हर्कराज राई साम्पाङको नेतृत्वमा नौ सदस्यीय कार्यसमिति गठन गरिएको छ। ‘सुम्निमा पारुहाङ प्रतिष्ठान नेपाल’ नामक संस्थामार्फत प्रतिमा निर्माणको कार्य अगाडि बढाइएको हो। मेयर साम्पाङले प्रतिमासहितको पार्क निर्माणका लागि जग्गा खरिद प्रक्रिया समेत सुरु भइसकेको जानकारी दिए।
यस अभियानलाई सफल बनाउन साम्पाङ १४ दिने भ्रमणका क्रममा बेलायत पुगेका थिए। त्यहाँ उनले विभिन्न नेपाली समुदायको सहकार्यमा करिब ५ करोड २८ लाख रुपैयाँ सहयोग संकलन गरेका छन्। साम्पाङले आफ्नो अभियानलाई हङकङ, सिंगापुर, अमेरिका लगायतका देशमा रहेका नेपाली समुदायसँग सहकार्य गर्दै अघि बढाउने योजना बनाएका छन्।
मेयर साम्पाङले प्रतिमा निर्माणको लागि कुनै सरकारी बजेटको आवश्यकता नरहेको बताउँदै आएका छन्। यस कार्यका लागि विभिन्न निजी क्षेत्र, दाताहरू, र नेपाली समुदायको सहयोग जुटाउने उनको योजना रहेको छ।
सुम्निमा पारुहाङको प्रतिमा निर्माणसँगै धरानलाई सांस्कृतिक र पर्यटकीय स्थलको रूपमा विकास गर्ने लक्ष्यसहित यो अभियान अघि बढाइएको हो।
