३०असार २०८१ धरान:ताप्लेजुङमा जिप दुर्घटना, सात जना घाइते
ताप्लेजुङको सिरिजंगा गाउँपालिका–४ तेल्लोकबाट सदरमुकाम फुङलिङ आउँदै गरेको बोलेरो जिप आज दिउँसो दुर्घटना हुँदा सात जना घाइते भएका छन् ।
मे १ ज ३३१३ नम्वरको जिप फुङलिङ नगरपालिका–७ पौडेल चोकमा सडकबाट ६ मिटर तल झरेको थियो । जिल्ला प्रहरी कार्यालय ताप्लेजुङका प्रहरी नायव उपरीक्षक रवि रावलका अनुसार जिपमा सवार सिरिजंगा गाउँपालिका–२ का माया पौडेल भट्टराई, वडा नं. ४ का इच्छा लिम्बू, सरिता भट्टराई, बुद्धि थापा, वडा नं. ५ का मुना भट्टराई, धनकुमार भट्टराई र इलामको रोङ गाउँपालिका–४ भालुझोडामा अबि तामाङ घाइते भएका हुन् ।
जिल्ला अस्पताल ताप्लेजुङले घाइतेहरुको अवस्था सामान्य रहेको जनाएको छ । स्टेरिङको टाइरेट गोली भाँचिएर सडकदेखि तल झरेको प्रारम्भिक जानकारी आएको रावलले जानकारी दिए।