कोशी प्रदेशका मुख्यमन्त्री हिक्मतकुमार कार्कीले सोमबार (आज) विश्वासको मत लिने भएका छन् । संविधानको धारा १६८ (५) अनुसार नियुक्त मुख्यमन्त्री कार्कीले उपधारा ४ अनुसार विश्वासको मत लिन लागेका हुन् ।
नेकपा एमाले र नेकपा माओवादी केन्द्रका ५२ सांसदको समर्थनमा मुख्यमन्त्री भएका उनलाई हालसम्म दुवै दलका सांसदले विश्वासको मत दिने देखिएको छ । कोशी प्रदेश सभामा ९३ सांसद मध्ये बहुमत पुर्याउन ४७ सांसद आवश्यक पर्छ जुन कार्कीको पक्षमा सहजै पुग्ने देखिन्छ ।
उता आइतबारको कार्य व्यवस्था समितिको बैठकमा नेपाली काँग्रेसले विश्वासको मत लिन हतार नगर्न आग्रह गर्यो । दलहरूबिच कुरा नमिल्दा संसद्को कार्यसूची तयगर्न बसेको बैठक विना निष्कर्ष सकिएको हो ।
नेपाली काँग्रेसका प्रमुख सचेतक गोपाल तामाङका अनुसार अदालतमा विचाराधीन भएको मुद्दा भएकाले केही दिन पर सार्न आग्रह गरिएको हो । बिहान ८ बजे काँग्रेस संसदीय दलको बैठक बसेर आधिकारिक धारणा बनाउने उनको भनाइ छ ।
