धरान,१९ फागुन: धरान उप-महानगरपालिका वडा नम्बर १६ को आयोजनामा भएको वडा स्तरीय अन्तर बिद्यालय हाजिरिजवाफ प्रतियोगितामा जेनिथ इङ्लिस बोर्डिङ स्कुल प्रथम भएको छ।
शुक्रबार शारदा बालिका नमुना मा.बि. मा सम्पन्न प्रतियोगितामा सिद्धार्थ शिशु सदन दोश्रो भएको छ। त्यस्तै धरान लिगामेन्ट रेसिडेन्सियल स्कुल तेश्रो भएको छ।
बिजेता बिद्यार्थीहरुलाई कार्यक्रमका प्रमुख अतिथि वडा अध्यक्ष मुरारी भट्टराई, शारदा बालिका स्कुलका प्रधानाध्यापक धर्मनारायण सिंह लगायतले ट्रफी, मेडल र प्रमाणपत्र बितरण गर्नुभयो। प्रतियोगितामा १६ नम्बर वडा बाल सन्जालको समेत सहकार्य रहेको थियो। 
बिद्यार्थीहरुको बौद्धिक क्षमताको बिकास गर्ने उदेश्यले वडाको बजेटबाट प्रतियोगीताको आयोजना गरिएको वडा अध्यक्ष भट्टराईले जानकारी दिनुभयो। प्रतियोगितामा वडाका आधा दर्जन बढी बिद्यालयहरुको सहभागिता रहेको आयोजकले जनाएको छ। कार्यक्रमको संचालन शारदा बालिका स्कुलका शिक्षक बिष्णु प्रसाद गुरागाईले गरेका थिए।
